Fra viddas idyll til slagmarken
– 1939 borgemánu gaskkamuttu loahpahuvvui mu bálvalusgeatnegasvuohta ja sáhtten vuolgit ruoktot Guovdageidnui. Muhto 1940 giđa ledjen fas Altagårdas dievas militearagárvvuid siste. Dál in lean boahtán dohko stullama dihte, dál ledjen boahtán ráhkkanan dihte soahtái!
– Duiska soahteveagat ledje cuoŋománu 9. beaivvi fallehan Norgga ja boahtán davás gitta Narviikka rádjái. Ja nu go gullostii, lei vašálaš mátkkis ain davveliidda. Dán máilmmi givrramus soahtefámu vuostá galge dál Davvi-Norgga unna jovkkožat biddjojuvvot soahtat. Orui gal dego Biibala muitalus Dávveha ja Goliáhta birra.
Dien láhkái muitala Biret-Issát 1940 soahtefearáinis birra vielljasis Ándii, gii loahpas lea dáid muittuid čállán girjin. Go girji Duottarráfis soahtešilljui ilmmai 1991:s, de lei vuosttaš geardde go beasaimet lohkat sápmelaš soalddáha vásáhusaid ja jurdagiid birra soađi mearihis vásihusaid siste. Dál muitaluvvo historjá dárogillii.
