Reálafagatearpmat lea applikašuvdna masa leat čohkkejuvvon reálafágaide guoskevaš sánit sihke dáro- ja sámegillii. Dat lea veahkkeneavvu mii ovddida sámegiela geavahusa fágagiellan sihke oahppamis ja muđui. Maiddái giellabargit, dulkkat ja sii geat leat oahppamen sámegiela, ožžot ávkki dás.
Dát applikašuvdna álkidahttá sihke oahpahusa, oahppama ja fágalaš ovdanbuktimiid, ja lea doarjjan nuoraide go sii áigot reálafágaáššiid birra hállat dahje ovdanbuktit juoidá juogo skuvllas dahje muđui.
Reálafágat (matematihkka, surbe, statistihkka, fysihkka ja kemiija) oahpahuvvojit sámegillii sámi skuvllain ja ásahusain.
Sihke oahpaheaddjit, oahppit ja váhnemat sáhttet veahkkeneavvus ohcat sániid ja tearpmaid.
Šaddá álki váhnemiidda veahkehit mánáid leavssuiguin go ii leat eará go ohcalit sáni applikašuvnnas mii lea telefovnnas dahje neahttabreahtas!
Leat oktiibuot masá 3000 ohcansáni goabbatge gillii.
Reálafágatearpmat-appa oasttát Apple Stores jus dus lea iOS, dahje Google Playis jus dus lea Android.
Applikašuvdna lea sátnečoakkáldat sámegielas dárogillii ja nuppi láhkai.
Das leat njeallje oasi:
Matematihkka-, surbe- ja statistihkkasánit sámegielas dárogillii ja dárogielas sámegillii: sullii 1000 ohcansáni guktui guvlui (surbe = duohtaoinnolašrehkenastin)
Fysihkka- ja kemiijasánit: 1700 ohcansáni guktui guvlui
Elemeanttaid (vuođđoávdnasiid) listu: 110 ohcansáni guktui guvlui
Veahkkeávdnasat: 96 ohcansáni govain guktui guvlui
Ohcanvejolašvuohta lea nu ahte go čállá moadde álgobustáva, de addá prográmma buot vejolašvuođaid daid álgobustávaiguin, ja geavaheaddji sáhttá de válljet listtus sáni man son lea ohcamen.
Dán applikašuvnna ráhkadeami jurdaga lea ovddidan Sámi joatkkaskuvlla ovddeš oahpaheaddji Arne Nystad. Son lea beaivválaččat geavahan sámegiela bargguid oktavuođas, leš dal oahpahusas dahje eará bargguin. Son oinnii dárbbu dákkár applikašuvdnii mii ođđaáigásaš, geavatlaš vugiin lea ávkin sihke nuoraide geat barget sámegielain ja maiddái oahpaheddjiide, giellabargiide ja earáide geat sámegiela čállet ja hállet.