Lieđđi Sámecus

Jeaggenieida noveallas gávdná boares­bárdni moarsi, fávrros nieidda geas lea čáppa unna vielpáš salas. Bárdni ii muital dán eatnái muhto suoláda sus biktasiid iežas moarsái, go moarsis leat dušše rámssadan náhkke­biktasat badjelis ja nu jávkkoda bárdni ruovttus, ja eadni guhkáša go bárdni ii šat boađe ruoktot. Olbmot ohca­gohtet boares­bártni.

Álelassii maid ovddosguvlui noveallas lea vuoras­olbmo muitalus iežas nuorra­vuođa birra, go son váivves skuvla­vásáhusaid geažil vikkai čiegadit iežas duogáža.

Biedju lea muitalus dan birra, go guokte guhká goabbat guovllus orron nuorra olbmo fas gávnna­deaba ođđasis luome­jeakkis ja vuolgiba ohcat čiegus bieju maid muita­lusaid mielde gávdnet dušše soames soga olbmot.

Noveallas Čoavdda govvi­duvvo guovtti nuora dilli, go servodat ii dohkket sudno gaskasaš ráhkis­vuođa.

Mun, Lieđđi Sámecus muitala muhtin eare­noamáš dáhpáhusa birra, mas guokte sáme­nissona 1800-logus leaba dolvo­juvvon veagal guhkás Sámi­eatnamis ja dan vártnu­his dili birra doppe.

Duohtamuitalus noveallas deaivida Heneš eallimis nu olu vuoste­gieđa oktanas, ahte juhka­goahtá ja juhká nu olu ahte son fáhkka oaidni­goahtá beljiid kámmár­glásas.

Guhkeguolbanis novealla govvida ruoktot máhccama váttis­vuođas, go dasa čatnasa vel earáge persovnna­laš váttis­vuohta.

Sieiva sápmelaš lea nuorra almmái, gii lea riegádan Londonis. Su eadni lea sápmelaš, muhto bárdni ii máhte sáme­giela iige dieđe olus maidege sápme­laččaid birra. Muhto dál son lea vuolgán Sápmái girjjit dievva lávkka ja áigu šaddat sieiva sápme­lažžan.

Noveallat muitalit iešguđet­lágan hásta­lusaid birra maid mii olbmot deaivi­dat máilmmis, ja makkár ieš­guđet­lágán hámis sáhttá veahkki boahtit.

Inga-Wiktoria Påve lea sárgon girjji olggoš­gova.