Karen Anne Buljo lea nominerejuvvon Davviriikkalaš Ráđi 2019 mánáid- ja nuoraid girjjálašvuođabálkkašupmái

Šiellaspeajal lea nominerejuvvon buoremus mánáid- ja nuoraidgirjji 2019 bálkkašupmái.

Govva: Marie Louise Somby, Árvu

Karen Anne Buljo čájeha iežas dáiddalaš čehppodaga divttaidis bokte maiguin govahallá myhtalaš fuođđuid, ja lea daidda čadnan diiddaid. Čálli lea gudnejahttán iežas guovlluid ja olbmuid ja govve ráhkesvuođa beliid divttaidis bokte. Earamuđui lea son čállán eksistensiálalaš divttaid ja dáid bokte govve son ges beliid olbmuid gaskavuođain. Son stoahká sániiguin ja alitterašuvnnaiguin.

Myhtalaš divttain govahallá čálli Karen Anne Buljo myhtalaš fuođđuid. Omd. Afruvvá mii iđista geasa ieš dáhttu.

Čálli čállá divttaid diiddaid vuođul, omd. Nagirvárrái/Niehkoilbmái gos gávdnojit gávpogat, áibmolaččat, lottit ja rokkit.

Ráhkesvuođa divttain govve čálli ráhkesvuođa beliid, omd. Almmi ráidalas divttas sávvá divtta ego alccesis almmi ráidalasa vai beassá viežžat ráhkkásii násttiid boahkánii.

Gudnijahttin divttain govve čálli guovlluid ja olbmuid. Áisároaivi divttas áigu divtta ego lávlut ja govvet guovllu. Go niegada Áisároaivvi, de bisána áigi.

Karen Anne Buljo

Karen Anne Buljo lea multidáiddár. Son lea sihke čálli, juoigi ja duojár. Diktagirjjis leat nu olu dovddut maid son divttaid čađa čehpedit ovdanbuktá lohkkiide.

Karen Anne Buljo (1964) orru dál Álttás, ja lea čállán mánáidgirjjiid, nuoraidgirjjiid ja jietnateáhteriid sihke mánáide ja ollesolbmuide. Son lea maiddái čállán ja almmuhan diktagirjjiid, ja mátkegirjji. Lassin son čállá oahppogirjjiid.