Nammaduvvon Davviriikkalaš Ráđi nuoraid- ja mánáid girjjálašvuođabálkkašupmái 2024

Hamburgerprinseassá – Eallá dušše oktii lea nuo­raid­romána mii gea­suha lohkki čuovvo­lit sámi nuo­raid juohke­beaivvá­laš ealli­mii. EDO dahje YOLO men­tali­teh­tain oah­pás­mahttá Stueng min Máreniin, ja su buriid ja hea­jos vásá­husaide.

Lohkki beassá per­sovnna­lač­čat oai­dnit mo bor­ran­váddu sáhttá stiv­ret olbmo jurda­giid ja láhtta­deami, ja mo nu dábá­laš go borra­muš šaddá reaidu mainna nagoda dus­tet hásta­lusaid mat čuh­cet dovd­duide. Stuenga muita­lan­vuohki lea sihke njuolggo­čuo­lat ja hearki, ja buktá mávsso­laš die­đuid dasa mo bor­ran­váddu váik­kuha nuorra olbmuid.

Girje­čálli lea ere­noa­máš čeah­pes muita­lead­dji gii gieđa­hallá dehá­laš ja mávsso­laš fát­táid mai­guin nuo­rat sáht­tet buoh­tas­taht­tit ieža­set ja oahp­pat juoga dain. Saia Stuengas lea mearkka­laš dáidu mainna son nu deaivi­lit čállá fát­táid mat leat nuorra olbmuid eal­lima guovddá­žis. Son čállá Márena sisk­kál­das- ja olg­gul­das fágga­demiid autensi­teh­tain mainna lohkki ii dušše ádde, muhto maid­dái ieš dovdá váldo­per­sovnna bákča­siid ja doaiva­giid. Gie­lain mii duoldá nuorra fámui­guin, seam­más go čállo­sis lea rávás­muv­vama deaddu, gas­kusta Stueng kom­pleksi­tehta bajás­šadda­mis otná servo­dagas. Lohkki gikta­luvvo čuov­vut jođu Márena buriid ja hea­jos vásá­husain Sámis sev­dnjes­áig­gis, miehtá dálvvi, gitta beas­saš­márka­niidda.

Romána hástala sámi servvo­daga gieđa­halla­goah­tit fát­táid mat leat vád­dát muhto maid birra dieh­tit, nugo bor­ran­vát­tut, iežas­vašu­heapmi, ráh­kis­vuohta seamma sohka­beal­lái, trau­mat, sek­suála­laš veahka­válddá­laš­vuohta ja digi­tála givssi­deapmi. Girji lea dehá­laš jietna dálá áig­gis, mii ii dušše čujut erenoa­máš hásta­lusaid sámi nuo­raid ealli­mis, muhto maid­dái daid máilmmá­laš hásta­lusaid mai­guin nuorra olbmot deaivi­dit go leat ieža­set saji gáibi­dea­men máilm­mis.

Saia Stueng (r. 1993) lea sámi čálli Kárášjogas eret. Sus lea sámi girjjá­laš­vuođa master­gráda UiT – Norgga árktalaš universitehtas. Son lea dál doavt­tir­gráda sti­pen­diáhta Sámi Allaskuvllas Guovdageainnus. Son lea bar­gan sáme­giel­oahpa­head­djin Sámi Joatkaskuvllas ja Stueng lei mielde sámi girje­čálli­oah­pus «Čális fal!» áigo­dagas 2015–2017. Stueng debu­terii girj­jiin Hamburgerprinseassa jagis 2017. Hamburgerprinseassa – Eallá dušše oktii lea nubbi girji váldo­per­sovnna Márena birra ja dan sáhttá loh­kat beroš­keahttá vuost­tas girj­jis.