Arvedávgeriikii lea nominerejuvvon buoremus Davviriikkalaš Ráđi Mánáid- ja nuoraid girjji 2023 bálkkašupmái.
Dál de buollá feasta!
Dáppe gos mii orrut, lea buot diŋggain ivdni, muhto makkár bat ivnniid luohti lea?
Vuolgge fárrui, mii vuolgit fitnat ivnniid riikkas; Arvedávgeriikii gos ijain, musihkas, luođis ja karamelláin leat visot arvedávggi ivnnit.
Buohkat ledje bovdejuvvon stuorámus festii Rássegáldui, mii lei dakkár sadji gos rásit mearridit buot ja danne lea áibbas buhtes áibmu, čáhci ja eana doppe.
Visot ivnnit bohte buriin mielain. Muhtumat bohte girddi, earát biekka mielde dahje borjjastedje čáziin.
Visot eallit ledje maid bovdejuvvon dán festii, ja vel buot mánát sin mihcamárnieguiguin.
Buohkat illudedje dasa mii galggai dáhpáhuvvat.
De čergii Baján ja Álddagas šleađggehii.
Buohkat healkkehedje:
– Oj. Vuoi, go bajándálki šaddagođii. Dál de arvigoahtá ja olles feasta billašuvvá.
De iđii stuorra Gollečeskes balva ja bivddii buot ivnniid boahtit ovdan vuoruid mielde. Balva bosádii gollegavjjaid mat sudde čuvgii, ja son bivddii buohkaid vuoigŋat dan sisa. Dál lei stuorra Gollečeskes balva álddagastán arvedávggi vuosttaš gearddi máilbmái.
Ivnnit čuvge nu garrasit ahte sii loktanedje ja ovttas sii šadde arvedávgin. Ná riegádii Arvedávgeriika! Buot ivnnit ledje doaimmas juohke sajis min eallimis, illun ja ivdnin. Arvedávgi báitá min buohkain nieguin ja muittuha min iežamet siskkáldas fámuin.
Dál de buollá feastá!
Arvedávgi lei nu ilus ahte ahte bosui balloŋŋaid, arvedávgeijaid, arvedávgemusihka ja arvedávgekaramellaid čieža iešguđet ivnnis.
Lea riegádan 1953 ja bajásšaddan Sirpmás Deanus, ja ássá dál Romssas. Son lea dovddus sámi čálli ja kulturbargi, geas lea nana ja máŋggabealat oahppu, omd. sámegiella, historjá ja kultuvra. Son debuterii 1976:s girjjiin Ámmul ja alit oarbmælli, dainna vuosttaš mánáidgirjjiin čállojuvvon sámegillii. Jagi maŋŋá ilmmai girji dárogillii namain Ammul og den blå kusinen. Dan rájes lea son čállán mánáidgirjjiid sihke sámegillii ja dárogillii. Son lea maid almmuhan poesiija- ja prosagirjjiid ollesolbmuid várás. Son lea čállán máŋggaid teáhterbihtáid/dramaturgiijaid mat leat čájehuvvon Beaivváš Sámi Teáhteris. Jagis 2022 lei son nominerejuvvon Davviriikkaid Ráđi girjjálašvuođa bálkkašupmái girjjiinis Beaivváš / Leve blant reptiler.
Ámmul ja alit oarbmælli
Čerbmen Bizi – Girdipilohtta
Tjermmim Bidtsi – Hálediddje
Tjorme Bietse – Girtepilote
Reinkalven Lille Bizi – Den flygende pilot
Sissel Horndal lea girječálli, govvasárgu ja govvadáiddár Murgosis eret Nordlánddas, gii lea ožžon máŋggaid bálkkašumiid iežas bargguid ovddas. Dál lea son goalmmát heave jo nominerejuvvon Davviriikkaid Ráđi mánáid- ja nuoraidgirjjálašvuođa bálkkašupmái.
Son lea miellahttun sihke Tegnerforbundet, NBK, Grafill (AMG), NBU (Norske Barne- og Ungdomsbokforfattere) ja lea maid miellahttun Forfattersentrum:as. Son jođiha fitnodaga Rabarbra Bokmakeri ja bargá sátne- ja govva gaskkustemiin. Sus lea oahppu earret eará Nordland Kunst- og Filmhøgskole ja Kunsthøgskolen Bergenis. Son lea oassálastán máŋggain dáiddačájáhusain ja lea bargan teáhterguoskevaš bargguid ja lea maid searvan iešguđetge čájálmasaide. Jagis 1998 oaččui son Nynorsk barnelitteraturpris debutgirjji ovddas Ei halspastillhistorie ja jagis 2008 ges oaččui seamma bálkkašumi girjjiin Himmelspringaren. Horndal lea maiddái leamaš Feastiváladáiddárin Kraftfestivalen:is jagis 2012.