Almmálaš sarvvabivdu mii ii goassige noga
Sámi almmi máidnasat lea girjjáš speallankoarttaiguin nástealmmi ja dan ihtagiid birra. Stuorra sarvva bivdu lea girjjáža váldomuitalus. Dáinna girjjážiin ja koarttaiguin mii háliidat dahkat dovddusin sámi nástealmmi go dat han lea áibbas eará go eará álbmogiin mat birastahttet min. Girjjážis leat dieđut ja máidnasat sámi nástealmmi birra, ja spealaiguin oahppá namaid ja ihtagiid sámegillii. Dát koartaspealla dahká sámiid nástealmmi dovddusin somás vuogi mielde, namalassii árbevirolaš koartaspeala bokte.
Girjjáš lea njealji gillii, sihke sámegielagat ja earát besset oahpásmuvvat sámi almmi máidnasiidda ja ihtagiidda ja suohtastallat spealadettiin.
Dán girjji ja spealaid sáhttá geavahit oahpahusas, ja maiddái ruovttuin go geahčada guovssahasaid oktan nástealmmiin.
Soaittát muhtun sevdnjes dálveeahkeda geahčastit almmi násttiide ja áiccat dan agálaš, almmálaš sarvvabivddu.
