Gelddolaš fantasiijaromána mánáide
Luohtojávrri oainnáhusat
Máidnasis leat ollu imašlaš dáhpáhusat ártegis fievrruiguin. Don beasat oahpásmuvvat gánddaguovttuin Ritni ja Urbán. Soai beassaba viimmat ijastallat guovttá tealttás. Iđitija de moriheaba ja amas nieiddaš lea ihtán tealtái.
Nieiddaš muitala iežas namman Laksi ja lea eahkes boahtán Luohtojávrris. Vuojána Alli son guđii Bieggavári alážii, go dat ii háliidan deike olbmuid sisa. Go gánddaguovttos jearraba mii báikkiid dat Luohtojávri lea, de gal nieiddaš bosáhallá ja lohká dan nu moalkás áššin muitališgoahtit. Son hásttesta baicce gánddaguoktá fárrui. Bieggavári alážis Laksi čájeha ahte visot dieid váriid duohken lea Luohtojávri, ja dál son gal ferte bivdit Alli boahtit viežžat sin. Ritni jearrala ahte gii bat Alli lea.
Laksi čilge ahte Alli lea hirbmat stuorra goaskin, ja son lea Luohtojávrris dat, gii doalvu mánáid hervvoštallanmátkkiide. Son bivdá Alli boahtit biškkanasain. Muhto bálkán dat dáhttu álo uhca dánssaža. Sii fertejit dalán dánsugoahtit go Alli ihtá oidnosii.
Sii gakcot Alli čielggi ala ja goaskin girdila. Gánddaguovttos orruba man nu láhkai uhccon, muhto dan eaba jolggat dadjat jitnosit. Makkár imašlaš mátkái leaba soai vuolgán?
