Hamburgerprinseassa – Eallá dušše oktii
«Ii dát lean dábálaš eahket, dát lei dat maŋimuš eahket goas buot lávii leat dábálaš ja oadjebas. Dat eahket go buot rievddai. Mu eallin rievddai ja eadni šattai amasolmmožin.»
Máren vásiha dan mas olles eallima lea ballan ja ferte mearridit áigu go eallit dainna vai jápmit. Son addá eallimii maŋimuš vejolašvuođa. Mii oahpásmuvvat Márena mánnávuođain, etniin ja borranváttuid álgguin. Dál ii leat šat Máhtte gii mearrida visot, dál lea mávssaheapmi aiddo álgán.
«Ovdal go háhppehan jurddašit dobbelii, de boahtá Ánne lagabui ja cummesta mu. Máilbmi bisána, ja jorribiegga mu siste golke.»
Romána gieđahallá fáttáid nugo seamma sohkabeali ráhkesvuođa, earálaganvuođa, traumaid, digitála givssideami ja eallinmovtta gávdnama.
Čálli
Saia Marilena Stueng
(r. 1993)
Lea sámi čálli Kárášjogas eret. Su vuosttaš romána Hamburgerprinseassa (2017) nogai jođánit vuorkkás maŋŋá almmuheami, juoga mii hárve dáhpáhuvvá sámi girjjálašvuođain. Stueng lei mielde sámi girječállioahpus «Čális fal!» áigodagas 2015–2017, ja sus lea sámi girjjálašvuođa mastergráda UiT – Norgga árktalaš universitehtas. Son bargá dál girjjálašvuođadiehttin ja lea váldimin doavttirgráda sámi girjjálašvuođadiehtagis Sámi allaskuvllas. Hamburgerprinseassa – Eallá dušše oktii lea Stuenga nubbi girji, ja lea guhká vurdojuvvon joatkka su vuosttaš girjái.
