Geasseluopmu

Gitta 13.7.–7.8.

Diŋgojumit eai doaimmahuvvo 10.7.–18.8.

Ingá Elin Marakatt debutere nuoraidrománain Sáve Sápmi

Mii oahpásmuvvat 12-jahkásaš Sávii ja Nilsai geat orruba Ađevuomis. Dáppe deaivvada sámi árbevirolaš eallin ođđa áiggiin. Fáhkkestaga ii mihkkege leat dego dábálaččat unna gilážis go eadni šaddá barggu haga. Geatki borrá sin bohccuid ja dat muohttá eanet go goassege ovdal. Mo bohccot galget dálvvi birget? Sáve eatnis, Ellen Marizzas, leat fas sosiála mediat, Youtube ja bloggen váldán badjel su eallima. Sáve sávvá ahte visot galggašii šaddat dego dábálaččat fas. Muhto dat šaddá dušše vel vearrát.


Sáve ja Nilsa leaba váldopersovnnaguovttos, ja soai vázziba 5. ja 6. luohká Gárasavvona Sámeskuvllas. Soai leaba buoremus olbmážagat ja leaba measta álo ovttas. Erenoamážit dálvebotta láveba soai juohke vahkkoloahpa vuodjit meahci ja čohkket čorragiid ja guođohit iežaska ealu. Soai leaba hui áŋgirat dolastallat meahcis. Sáve eadni, Ellen Marizza bargá gielddakántuvrras ja su áhčči lea boazovázzi.

Sáves lea dábálaš eallin gitta dassážii go ovtta beaivvi go eatni boahtá čieru Sáve latnjii.

Ráfálaš árgabeaivvit rivdet go Sáve eadni, dáiddar ja neavttár Ellen Marizza massá barggu gielddaviesus, go Gárasavvonis heaittihuvvo olles gielddadoaibma ja máŋgalogis masset barggusteaset.

Ellen Marizza náđđu ruoktot ja Sáve šaddá okto gillát go ii duostta muitalit ruovttudili Nilsai, go ballá ahte son muitala dán buohkaide. Loahpas Ellen Marizza fuobmá bloggegoahtit ja nu YouTube, instagramma ja bloggen váldá badjel olles su eallima.

Ellen Marizza vuostálastá dan mielahis gálvogeavaheami máilmmis ja sin lagasguovlluin ja danin buokčaladdá kontaineriin mat leat gávppiid duogábealde, gosa gávppit bálkot borramušaid maid ii leat vel dáhton oba mannange meaddel, ja ohcá ja viežžá buriid borramušaid doppe.

Sáve mielas lea nu heahpat go su eadni lea šaddan ruska buokčaleaddjin.

Ellen Marizza gal lágida miellačájáhusaid vel stuorra gávppiid vuostá maid ja sosiála mediat leatge buorit gaskaoapmin diktit olles máilmmi diehtit mii ain dáhpáhuvvá.

Sáve áhčči Lásse Andreas lea eanaš áiggi bohccuid luhtte Áslat-ednuin.

Duoddaris geatki borrá sin bohccuid ja eiseválddiin eai oaččo veahki maid bivdet ja fertejit johttát. Dasa lassin muohtigoahtá nu olu ja ii goassige leat ovdal leamašan ná olu muohta vuomis. Mo dál galget birgehit ealuset?

Fuođđarat bohccuide leat divrasat ja áhčči šaddá mannat bargat ruvkkiin Gironis vai sii nagodit oastit biepmu bohccuide.

Románas lea sihke humora ja duohtavuohta ja čálli váldá ovdan iešguđetlágan fáttáid nugo boaittobealbáikkiid problematihka, boazodoalu, dálkkádatrievdama ja sosiála mediaid eallima.

Laila Labba ja Ingá Elin Marakatt leaba ovttas ráhkadan olggoža girjái.

Girječálli

Ingá Elin Marakatt

Girječálli Ingá Elin Marakatt

Govvideaddji: Olof Sarri

Ingá Elin Marakatt (r.1989) lea sámi girječálli Áđevuomis eret ja gullá Lávnnjitvuomi čerrui.

Son lea servodatberošteaddji ja bargá boazodoalus, journalistan ja čállin.

Sus lea servodat- ja kulturoahppu barchelor Cultural analysis Ruotas, Upmi universitehtas.

Son lea čađahan Sámi Girječálliid Searvvi ja Sámedikki girječálliidoahpu Čális fal! 2017–2019.

Čálli oaččui 2019:is «Tage ja Lilly Frids stipeandda nuorra čálliide» dán debuhta romána Sáve Sápmi ovddas.

Oktavuođadieđut

Tlf.: 070-22 02269

E-poasta:

Oktavuohta