Nominerejuvvon Davviriikkalaš Ráđi nuoraid- ja mánáid girjjálašvuođabálkkašupmái 2026
Somá, somá! Min muitalusat ja min árbi seailluhuvvo ja fievrriduvvo boahttevaš buolvvaide ja maiddái máilbmái
Inga Elin Marakatt girji Elsa, Jovnna ja Sirkus Maximus lea liekkus, gelddolaš ja mágihkalaš muitalus mii fátmmasta sihke mánáid ja ollesolbmuid. Láhppon sirkuselefántačivgga ohcama bokte čálli doalvu min máilbmái gos ustitvuohta, roahkkatvuohta ja sáhkkiivuohta leat guovddážis – seammás go sámi kultuvrra, historjjá ja identitehta uvssat rahpasit.
Girji ovttastahttá humora ja vásáhusaid starga gullevašvuođa ja kulturárbbi lávkkiiguin, ja čájeha mo rabasvuođain ja gudnejahttimiin sáhttá ovttastahttit dan mii lea oahpis ja amas. Ealas njálmmálaš gielain ja nana árbevirolaš árvvuiguin, nugo luonddu ja servodaga gudnejahttimiin, šaddá muitalus sihke vásáhussan ja dehálaš kulturšaldin.
Dát lea eanet go mánáidgirji – dát lea movttiidahtti muittuhus das ahte galggat leat čeavlái das gii don leat, seammás go duosttat guorahallat máilmmi ja lagasbirrasa.
Čálli
Inga Elin Marakatt (r. 1989) lea sámi čálli Ađevuomis Ruoŧas eret. Son čállá mánáid- ja nuoraidgirjjiid, filmmaid, divttaid ja eará giehtačállosiid. Marakatt lea servodatberošteaddji, bargá boazodoalus ja journalistan. Son lea studeren servodat- ja kulturoahpu bachelora Cultural analysis, girjjálašvuođa, stáhtaoahpahusa ja sámegiela Ubmi universitehtas Ruoŧas. Jagiid 2017–19 Marakatt čađahii Sámi Girječálliid Searvvi ja Sámedikki girječálliidoahpu «Čális fal!»
Son lea čállán earret eará guhtta mánáidgirjji, nuoraidgirjji ja Unborn biru oanehis sámi balddonasfilmma mainna son lea vuoitán bálkkašumiid olgoriikkas ja Tromsøpalmen Romssa internationála filbmafestiválas jagi 2023.
Govven: Karen Ann Hurri
Sárgu
Inga-Wiktoria Påve (r. 1990) lea govvadáiddár ja hábmejeaddji Gironis eret Davvi-Ruoŧas. Son lea bajásšaddan boazodoalus ja geavaha iežas duogáža inspirašuvdnan. Påve geavaha sámi kultuvrra ivnniid ja hámiid iežas dáidagiin. Påve lea studeren pedagogihka ja dáiddapedagogihka Ubmi universitehtas Ruoŧas. Son lea maid studeren sámi árbevirolaš duoji Johkamohkis Ruoŧas.
Govven: Carl Johan Utsi
