Appelsingirdi
Mánáidgirji 3–6- ja 6–9-jahkásaččaid várás. Áhčči lea vuolgimin čáhcegirdi mielde duoddarii. Áhčči čohkke mánáid iežas lusa ja muitala alddis leat hui buorre hutkkus. Son áigu luoitilit 10 appelsiinna girdi glássaráigge olggos bajábeale áhku ja ádjá šilju. Son bivdá mánáid ohcat daid dassážii go son joavdá fas ruoktot.
Girječálli Marit Kirsten Anti Gaup
Mánát nu illudit ohcat daid appelsiinnaid maid áhčči áiggui luoitilit olggos girdi glássaráigge.
Mánát čužžot ja gaifájit gokko son dat appelsiinnat gahččet, go girdi girdá badjel sin stobu. Muhto eai sii oainne ovttage appelsiinna gahččamin! Sii liikká ohcagohtet daid. Mánát ohcet appelsiinnaid guhká ja jurddašišgohtet ahte ammal áhčči gal lea dájuhan sin.
Álggos gávdnet sii dušše appelsingaraid. Muhtin lea borran appelsiinna ja guođđán dušše garaid. Nuppi appelsiinna maid gávdnet, lea deađvasan duolbbasin, dego muhtin livččii dulbmon dan. Dál sis gal fas badjána doaivva ahte ammal appelsiinnat liikká soitet gahččan girdi glássaráigge olggos? Sii ain ohcet appelsiinnaid.
Lea go son duohta ahte dát leat dat appelsiinnat maid áhčči áiggui luoitit girdi glássaráigge olggos, ja ahte dat leat duođaid gahččan sin šilljui?
