Geađgeloddi

Novealla­čoakkáldat ráviso­lbmuide

Risten Sokki girddaša ja gevleda iežas Geađgeloddi-novealla­čoakkál­dagain njuolla­bissus Sáme­diggái, spiilesta gumppe­náhki seaidnái, cuvke geađge­lotti, čakča­máná árkkal­mastá, garuha daid biro adjektiiv­vaid. De ges galleda guolle­ádjá nieidda ja loktana Aurora Borealisa vuollái ovdal go de luoitáda Gassa­njárgga máddagii, imašta Poasta-Hánssa páhka ja niegada Álle­geađggi.


Geađgeloddi lea novealla­čoakkál­dat mas leat 10 novealla mat leat čállo­juvvon historjjálaš ja dáláš dáhpá­husaid vuođul. Noveallat leat davvi­sáme­gillii.

Sáhttá lohkat ovtta ja ovtta novealla sierra, muhto leat máŋga dáhpáhusa mat rastil­dit ja čákŋet eará noveal­laide ja čadnet oktii dáid dego geavlin, man bokte lohkki oažžu ollis­laš gova daid ieš­guđet dáhpá­husain.

Dán girjji fáttát leat eallimis vižžo­juvvon. Doppe lea moraš, ráhkes­vuohta, jápmin, riegá­deapmi, veagal­váldin, mánát geat bajás­šaddet mánáid­ruovttuin ja muhtu­mat, geat máhccet Sápmái rávis­olmmo­žin.

Risten Sokki

Govva: Risten Sokki

Risten Sokki lea herven girjji iežas njuohta­miin. Girjji namma lea čállo­juvvon su eatni, Sunnen-Iŋggá giehta­čállosiin.

Oktavuohta